ബഹ്‌റൈനിലെ തിയേറ്ററുകളിലേക്ക് 'ആടുജീവിതം' ; ഏപ്രിൽ 3 മുതൽ പ്രദർശപ്പിക്കാൻ അനുമതി

ബഹ്റെെൻ: വിലക്ക് നീക്കി ആടുജീവിതം ബഹ്‌റൈനിലെ തീയറ്ററുകളിലേക്ക് എത്തുന്നു. ഏറെ ദിവസത്തെ കാത്തിരിപ്പിന് ശേഷം ആണ് ബഹ്റെെനിലെ തിയേറ്ററുകളിലേക്ക് ആടുജീവിതം എത്തുന്നത്. ഏപ്രിൽ 3 മുതൽ പ്രദർശപ്പിക്കാൻ അനുമതി ലഭിച്ചിട്ടുണ്ട്. ബഹ്റെെനുമായി ചിത്രത്തിന് വലിയ ബന്ധമാണ് ഉള്ളത്. അതിനാൽ ചിത്ര രാജ്യത്ത് റിലീസ് ചെയ്യാത്തതിനാൽ വലിയ നിരാശയിൽ ആയിരുന്നു പ്രവാസികൾ.

മുൻ ബഹ്‌റൈൻ പ്രവാസിയാണ് ആടുജീവിതം എഴുതിയ ബെന്യാമിൻ. സൗദിയിൽ നിന്നും രക്ഷപ്പെട്ട ശേഷം അദേഹം ഏറെ കാലം ബഹ്റെെനിൽ ആയിരുന്നു. അതുകൊണ്ട് തന്നെ ബഹ്റെെനിൽ നിരവധി സുഹൃത്തുക്കൾ ഇദ്ദേഹത്തിനുണ്ട്. ജിസിസി രാജ്യങ്ങളിൽ യുഎഇയിൽ മാത്രമാണ് ചിത്രം പ്രദർശന അനുമതി ലഭിച്ചിരുന്നത്.

എന്നാൽ ഇപ്പോൾ ഏപ്രിൽ 3 മുതൽ ബഹ്‌റൈനിലെ തീയറ്ററുകളിലും ചിത്രം എത്താൻ പോകുന്നു. ആടുജീവിതം രാജ്യത്ത് പ്രദർശനത്തിന് എത്തുമെന്നത് ബഹ്‌റൈനിലെ തീയറ്റർ മാനേജ്മെന്റ് അറിയിച്ചിട്ടുള്ളത്. ആദ്യ ഷോയ്ക്ക് തന്നെ എല്ലാ തീയറ്ററുകളിലും വലിയ തോതിലുള്ള ബുക്കിങ് ആണ് ഉള്ളത്. സിനിമ എത്തും എന്ന വാർത്ത എത്തിയതോടെ ഓൺലെെൻ വഴി ടിക്കറ്റ് ബുക്ക് ചെയ്യുന്നവരുടെ എണ്ണവും കൂടി. കൂടാതെ പലരും നേരിട്ടെത്തി ടിക്കറ്റ് ബുക്ക് ചെയ്യുന്നുണ്ട്.

പൃഥ്വിരാജ് ഹോളിവുഡ് നടനും നിർമ്മാതാവുമായ ജിമ്മി ജീൻ-ലൂയിസ്, അറബ് അഭിനേതാക്കളായ താലിബ് അൽ ബലൂഷി, റിക്ക് അബി എന്നിവരും ചിത്രത്തിൽ പ്രധാനവേഷത്തിൽ എത്തുന്നുണ്ട്. ചിത്രം കേരളത്തിൽ വലിയ കളക്ഷൻ ആണ് നേടി കൊണ്ടിരിക്കുന്നത്. കണ്ണ് നിറയാതെ തിയേറ്ററിൽ നിന്നും ഇറങ്ങി വരാൻ സാധിക്കില്ല എന്നാണ് ചിത്രം കണ്ടവരുടെ അഭിപ്രായം. കേരളത്തിൽ ഓസ്കാർ ലഭിക്കാൻ പോകുന്ന ചിത്രം ചിലപ്പോൾ ആടുജീവിതം ആയിരിക്കും എന്നും സിനിമ കണ്ട് പുറത്തിറങ്ങിയവർ പറയുന്നു.