സന്ദർശന വിസയിലെത്തുന്ന പ്രവാസികൾക്ക് സന്തോഷ വാർത്ത : ഒരു വര്‍ഷത്തേക്ക് വിദേശ ഡ്രൈവിങ് ലൈസന്‍സ് ഉപയോഗിക്കാം

അന്താരാഷ്ട്ര ഡ്രൈവിങ് ലൈസന്‍സോ സാധുതയുള്ള വിദേശ ലൈസന്‍സോ കൈവശമുള്ള സന്ദര്‍ശകന് രാജ്യത്ത് പ്രവേശിക്കുന്ന തീയതി മുതല്‍ ഒരു വര്‍ഷത്തേക്ക് വാഹനങ്ങള്‍ ഓടിക്കുന്നതിന് അനുവാദമുണ്ടെന്ന് സൗദി ജനറല്‍ ട്രാഫിക് ഡയറക്ടറേറ്റ്.

റിയാദ്: സന്ദര്‍ശന വിസയില്‍ രാജ്യത്ത് എത്തുന്നവര്‍ക്ക് ഒരു വര്‍ഷത്തേക്ക് വിദേശ ഡ്രൈവിങ് ലൈസന്‍സ് ഉപയോഗിക്കാമെന്ന് സൗദി ജനറല്‍ ട്രാഫിക് അതോറിറ്റി. വിദേശ ടൂറിസ്റ്റുകളെ രാജ്യത്തേക്ക് ആകര്‍ഷിക്കാന്‍ രാജ്യം ആവിഷ്‌കരിച്ച് നടപ്പാക്കിവരുന്ന നിരവധി സൗകര്യങ്ങളുടെയും പദ്ധതികളുടെയും തുടര്‍ച്ചയാണിത്.

എണ്ണയെ ആശ്രയിക്കുന്ന സമ്പദ്‌വ്യവസ്ഥ വൈവിധ്യവത്കരിക്കുന്നതിന്റെ ഭാഗമായി വിനോദസഞ്ചാര മേഖലയില്‍ നിന്നുള്ള വരുമാന വര്‍ധന സൗദിയുടെ പ്രധാന ലക്ഷ്യമാണ്. സൗദി വിഷന്‍ 2030 ലക്ഷ്യങ്ങളിലെ ഏറ്റവും പ്രധാന മേഖലകളിലൊന്നുകൂടിയാണ് ടൂറിസം.

അന്താരാഷ്ട്ര ഡ്രൈവിങ് ലൈസന്‍സോ സാധുതയുള്ള വിദേശ ലൈസന്‍സോ കൈവശമുള്ള സന്ദര്‍ശകന് രാജ്യത്ത് പ്രവേശിക്കുന്ന തീയതി മുതല്‍ ഒരു വര്‍ഷത്തേക്ക് അല്ലെങ്കില്‍ ലൈസന്‍സ് കാലഹരണ തീയതി വരെ വാഹനങ്ങള്‍ ഓടിക്കുന്നതിന് അനുവാദമുണ്ടെന്ന് സൗദി ജനറല്‍ ട്രാഫിക് ഡയറക്ടറേറ്റ് വിശദീകരിച്ചു.

മള്‍ട്ടിപ്പിള്‍ എന്‍ട്രി വിസയില്‍ സൗദിയിലെത്തുന്ന ബിസിനസ് സന്ദര്‍ശകര്‍ക്ക് സാധുതയുള്ള വിദേശ ഡ്രൈവിങ് ലൈസന്‍സ് ഉപയോഗിക്കാനാകുമോ എന്ന പ്രവാസിയുടെ ചോദ്യത്തിന് നല്‍കിയ മറുപടിയിലാണ് ട്രാഫിക് ഡയറക്ടറേറ്റ് ഈ വിശദീകരണം നല്‍കിയത്.

കൂടുതല്‍ വിദേശ വിനോദ സഞ്ചാരികളെ രാജ്യത്തേക്ക് ആകര്‍ഷിക്കുന്നതിനായി നിരവധി രാജ്യങ്ങളിലെ പൗരന്മാര്‍ക്ക് ടൂറിസ്റ്റ് വിസ ഓണ്‍ അറൈവല്‍ അനുവദിക്കാന്‍ അടുത്തിടെ തീരുമാനിച്ചിരുന്നു. നിക്ഷേപകരായ വിദേശികളുടെ പ്രവേശനം ലളിതമാക്കുന്നതിന് കഴിഞ്ഞ ജൂലൈയിലാണ് വിസിറ്റിങ് ഇന്‍വെസ്റ്റര്‍ വിസ എന്ന പേരില്‍ ബിസിനസ് വിസിറ്റ് ഇലക്ട്രോണിക് വിസ ആരംഭിച്ചത്. രാജ്യത്ത് വിദേശ നിക്ഷേപം വര്‍ധിപ്പിക്കുന്നതിനാണിത്.

സൗദി സന്ദര്‍ശിക്കാന്‍ ആഗ്രഹിക്കുന്ന വിനോദ സഞ്ചാരികള്‍ക്ക് ടൂറിസ്റ്റ് വിസയ്ക്ക് പകരം വിസിറ്റ് വിസയിലൂടെയും പ്രവേശനം അനുവദിക്കുന്നുണ്ട്. തിരഞ്ഞെടുക്കപ്പെട്ട രാജ്യങ്ങളില്‍ നിന്നുള്ളവര്‍ക്ക് സൗദി വിദേശകാര്യ മന്ത്രാലയത്തിന്റെ വെബ്‌സൈറ്റിലൂടെ മുന്‍കൂറായോ സൗദിയില്‍ പ്രവേശിക്കുന്ന സമയത്തോ വിസയ്ക്ക് അപേക്ഷിക്കാം.

ഈ വര്‍ഷം 2.5 കോടി വിദേശ വിനോദസഞ്ചാരികളെ സ്വീകരിക്കാനാണ് രാജ്യം ലക്ഷ്യമിടുന്നത്. 2030ഓടെ 10 കോടി സന്ദര്‍ശകരെ എത്തിക്കാനാണ് ഉദ്ദേശം. ടൂറിസം വ്യവസായത്തിലൂടെ 10 ലക്ഷത്തിലധികം തൊഴിലവസരങ്ങള്‍ സൃഷ്ടിക്കാമെന്നും സമ്പദ്‌വ്യവസ്ഥ ശക്തിപ്പെടുമെന്നും പ്രതീക്ഷിക്കുന്നു.

ഉംറ വിസ നല്‍കുന്നത് ഗണ്യമായി ഉയര്‍ത്തി സന്ദര്‍ശകരെ രാജ്യത്ത് എത്തിക്കാനും കഴിഞ്ഞ കുറച്ച് വര്‍ഷങ്ങളായി സൗദി വലിയ പരിഷ്‌കാരങ്ങള്‍ വരുത്തിയിരുന്നു. പേഴ്‌സണല്‍, വിസിറ്റ്, ടൂറിസം വിസകള്‍ എന്നിങ്ങനെ വ്യത്യസ്ത തരത്തിലുള്ള എന്‍ട്രി വിസകള്‍ കൈവശമുള്ളവര്‍ക്ക് മക്കയിലെത്തി ഉംറ ചെയ്യാനും മദീനയിലെ പ്രവാചകന്റെ മസ്ജിദില്‍ മുഹമ്മദ് നബിയുടെ (സ) ഖബറിടം സന്ദര്‍ശിക്കാനും അനുവാദമുണ്ട്. വിദേശത്തുള്ള സുഹൃത്തുക്കളെ രാജ്യത്തേക്ക് സന്ദര്‍ശനത്തിന് കൊണ്ടുവരാനും ഉംറ ചെയ്യാനും അനുവദിക്കുന്ന വിസയ്ക്ക് ഇപ്പോള്‍ സൗദി പൗരന്മാര്‍ക്ക് അപേക്ഷിക്കാനും കഴിയും. നാല് ദിവസത്തെ ട്രാന്‍സിറ്റ് വിസ ആരംഭിക്കുകയും മക്ക, മദീന ഉള്‍പ്പെടെ സൗദിയില്‍ എവിടെയും സന്ദര്‍ശിക്കാന്‍ അനുമതി നല്‍കുകയും ചെയ്യുന്നുണ്ട്. നാല് ദിവസത്തെ ട്രാന്‍സിറ്റ് വിസയ്ക്ക് 90 ദിവസം കാലാവധിയുണ്ട്.